Անհատական / Պտղնիի տաճար, Սուրբ Պողոս-Պետրոս եկեղեցական համալիր, Նեղուցի տաճար, Արզականի տաք հանքային ջրերի լողավազան

Ծրագիր՝

150 կմ

• Պտղնիի տաճար
• Սուրբ Պողոս-Պետրոս եկեղեցական համալիր
• Նեղուցի տաճար
• Արզականի տաք հանքային ջրերի լողավազան

Տուրի առաջին կանգառը Պտղնիի տաճարն է (Պտղնավանքը): Հայկական ճարտարապետության վաղ միջնադարյան այս հուշարձանը կառուցվել է իշխան Մանուել Ամատունու կողմից VI դ. վերջին – VII դ. սկզբին: Կիսավեր տաճարից պահպանվել են հյուսիսային պատը, հարավային պատի արևելյան մասը և արևելյան գմբեթակիր կամարը: Տաճարը լուսավորվել է լայն լուսամուտներով, ունեցել է ճոխ ձևավորված երեք մուտք` հյուսիսային, հարավային և արևմտյան: Պտղնիի տաճարը նշանավոր է իր հարուստ հարդարանքով` բուսական, երկրաչափական մոտիվներով բարձրարվեստ զարդաքանդակներով ու պատկերաքանդակներով: Եզակի են առյուծին նետահարող, ձի հեծած Մանուել Ամատունու քանդակը հարավային մուտքի զարդակամարի ձախ` հորիզոնական մասում և առյուծի դեմ մենամարտող Սահակ Ամատունու քանդակը աջ կողմում: Ուշագրավ են նաև հարավային շքամուտքի կամարի կենտրոնում  Աստվածածնի պատկերաքանդակը, սափորների քանդակաշարով քիվը, արմավենու ծառի տակ նստած առյուծի քանդակը:

Տուրի հաջորդ կանգառը Սուրբ Պողոս-Պետրոս եկեղեցական համալիրն է, որը գտնվում է Ակունք գյուղում: Այն բաղկացած է Ս. Պողոս, Ս. Պետրոս եկեղեցիներից, մատուռից և գերեզմանատնից: Ս. Պողոս եկեղեցին կառուցվել է XII-XIII դդ. և իրենից ներկայացնում  է քառակուսի հատակագծով կառույց: Թաղը և երկթեք ծածկը փլվել են: Հյուսիսային պատին կա շինարարական բովանդակությամբ անթվակիր արձանագրություն, ըստ որի՝ եկեղեցին և գավիթը կառուցվել են Ասլանի և վերջինիս եղբայր Վիրապշահի կողմից: Եկեղեցին նորոգվել է հավատացյալների ջանքերով, ինչի արդյունքում կառույցը կորցրել է իր նախկին տեսքը:

XIII դ.-ում կառուցված Ս. Պետրոս եկեղեցին գտնվում է  թեք սարալանջին և իրենից ներկայացնում է թաղածածկ, երկթեք տանիքով միանավ սրահ: Կառուցված է սև և նարնջագույն սրբատաշ տուֆից:

Եկեղեցիների հյուսիսային կողմում, ժայռերի մեջ գտնվում է մի քարայր, որտեղ 1980-ական թթ. հնագետ Հրաչյա Ղազարյանը հայտնաբերել է քարեդարյան գործիքներ:

Տուրի հաջորդ կանգառը Նեղուցի վանքն է:  Նեղուցի վանքը գտնվում է Արզական գյուղից մեկ կմ հյուսիս-արևմուտք և շրջապատված է խիտ անտառներով:  Վանքը բաղկացած է եկեղեցուց, կից գավթից և առանձին փոքր մատուռից: Վանքը կառուցվել է X-XIդդ.: Գավթի պատերին պահպանվել են XIIIդ. արձանագրություններ: Վանքի շրջակայքում կա խաչքարերով հարուստ գերեզմանոց: 

Տուրի վերջին կանգառը Արզականի տաք հանքային ջրերի լողավազաններն են: Արզահանը միջին դարերում հիշատակվում է Արտավազդական անվամբ: Գյուղը հայտնի է իր մի շարք տաք հանքային աղբյուրներով: Ընդերքից բխող բնական բուժիչ հանքային ջուրը իր եզակի բաղադրությամբ նման է աշխարհահռչակ Վիշիյի (Ֆրանսիա), Բորժոմիի (Վրաստան) և Դիլիջանի (Հայաստան) հանքային ջրերին: Հանքային ջրի ջերմաստիճանը հասնում է 54 ºC-ի: Տաք լոգանքները բարենպաստ ազդեցություն են թողնում ողջ օրգանիզմի վրա, բարելավում սիրտանոթային համակարգի աշխատանքը և լավացնում աղեստամոքսային տրակտի գործունեությունը: 

Մեկնում՝ 10:00

Վերադարձ՝ 20:00

Մեկնելու վայր՝ Հակոբ Հակոբյան 1/ Մերգելյան ինստիտուտի հարևանությամբ

1 անձը - 50․000 դրամ,
2-3 անձ - 35․000 դրամ,
4-10 անձ - 27․000 դրամ,
11-20 անձ - 22․000 դրամ,
21-30 անձ - 12․000 դրամ