Գյումրի, Մարմաշենի վանք, Ախուրյան գետ

• Գյումրիի Սև բերդ
• Գյումրիի Մայր Հայաստան
• Գյումրիի կենտրոն
• Մարմաշենի վանք
• Ախուրյան գետ
• Մարմաշենի ջրվեժ
• Հեղնար աղբյուր

Օրը կսկսենք Գյումրի քաղաքից: Այստեղ են մեզ սպասում բազմաթիվ տեսարժան վայրեր: Ունենալով երեքհազարամյա պատմություն և լինելով Հայաստանի ամենահին բնակավայրերից մեկը՝ Գյումրին մի արտասովոր վայր է: Գյումրին այն եզակի հայկական քաղաքներից է, որտեղ դեռ պահպանել է 19-րդ դարի ճարտարապետության ոգին:

Մեր հիմնական նպատակը քաղաքի կենտրոնական մասին ծանոթանալն է:

Մենք կայցելենք՝

• Յոթ Վերք եկեղեցին (Սուրբ Աստվածածինը), որի տարածքում XVII դարում գտնվում էր Կամսարական իշխանների կառուցած մատուռը, որտեղ պահվում էր “Յոթ Վերք” սրբապատկերը: Հենց այդ պատճառով էլ նոր կառուցված եկեղեցին (1873-1884թթ.) կոչվել է «Յոթ Վերք»:
• Սուրբ Ամենափրկիչ եկեղեցին, որը կառուցվել է Անիի Մայր Տաճարի ճարտարապետության նմանությամբ 1858-1872թթ.: Եկեղեցու բակում տեղադրված է 1988 թ-ի երկրաշարժին նվիրված՝ Անմեղ զոհերին, բարեգութ սրտերին հուշարձանը:
• Սբ. Գրիգոր Լուսավորչի Եկեղեցին, որը տեղակայված է Ռուստավելի և Ջիվանի փողոցների խաչմերուկում: Հին եկեղեցին կառուցվել է 1862թ.-ին և կոչվել է «Գեղցոնց ժամ»:
• Աբովյան փողոցը, որը քաղաքի հին մասն է, այստեղ պահպանվել է 19-րդ դարի ճարտարապետության ոգին: Այստեղ են գտնվում հին բաղնիքը, տիկնիկային թատրոնը, Գեղարվեստի ակադեմիան, շենքերը, որտեղ ապրել են նշանավոր մարդիկ:
• Վարպետաց փողոցը, որտեղ գտնվում են Շիրազի, Իսահակյանի, Մհեր Մկրտչյանի թանգարանները:
• Մարիամ և Երանուհի Ասլամազյան քույրերի պատկերասրահը:
• Ձիթողցոնց տուն-թանգարանը՝ կենցաղի և ազգային ճարտարապետության թանգարանը:
• Հաղթանակի փողոցում կայցելենք Մերկուրովի տուն-թանգարանը:
• Գյումրիի ժողովրդական ճարտարապետության և քաղաքային կենցաղի թանգարանը։
• Սրբոց Նահատակաց կաթոլիկ եկեղեցին։

Ճանապարհը կշարունակենք դեպի ռուսական եկեղեցի (Պլպլան Ժամը), այնտեղից կուղևորվենք դեպի «Մայր Հայաստան-Սև բերդ» ռեկրեացիոն գոտին: «Սև բերդը» եղել է պաշտպանական կառույց և ծառայել է որպես զինվորական բանտ։ Ռեկրեացիոն գոտու միջնամասում բլրի վրա 1975 թվականին կառուցվել է «Մայր Հայաստան» հուշահամալիրը: Այդ հուշարձանները Գյումրի քաղաքի համար նշանակալից են՝ բերդը որպես քաղաքի հիմնադրման, արձանը որպես բացառիկ արվեստի նմուշ և հայ ժողովրդի հաղթանակների խորհրդանիշ:

Գյումրիից կուղևորվենք դեպի Մարմաշենի վանական համալիր, որը հայկական ճարտարապետության լավագույն հուշարձանախմբերից է, եղել է միջնադարյան Հայաստանի մշակութային և կրոնական նշանավոր կենտրոն: Իր ճարտարապետական հորինվածքով նմանվում է Անիի Մայր տաճարին: Մարմաշենը X դ. վերջի հայ միջնադարյան ճարտարապետության վառ օրինակն է:

Այստեղ են գտնվում նաև Վահրամաբերդը,  Մարմաշենի ջրվեժը և «Հեղնար աղբյուր» հուշակոթողը: «Հեղնար աղբյուր» վիպակը 1935 թ-ին գրել է հայ անվանի բանաստեղծ, արձակագիր և թարգմանիչ Մկրտիչ Արմենը, և 1970 թ-ին « Հայֆիլմ» կինոստուդիայում նկարահանվեց համանուն գեղարվեստական ֆիլմը: Մայրամուտը կդիմավորենք Ախուրյան գետի ափին:

Մեկնում՝ 09։00
Վերադարձ՝ 21։00

Մեկնելու վայր՝ Հակոբ Հակոբյան 1/ Մերգելյան ինստիտուտի հարևանությամբ