Յոգա / Վահագնի և Աստղիկի ջրվեժներ, Աղջոց վանք, Գեղմահովիտի եկեղեցի (քայլարշավ Խոսրովի արգելոցում)

Ծրագիր՝

• Յոգայի պարապմունք
• Վահագնի ջրվեժ
• Աստղիկի ջրվեժ
• Աղջոց վանք
• Գեղմահովիտի եկեղեցի

Շարունակում ենք զբաղվել յոգայով՝ բնության գրկում: Այս անգամ առաջարկում ենք բացառիկ արկածային էկոտուր Խոսրովի  արգելոցի տարածքով: 

 Արգելոցի տարածք մուտք գործելուց հետո տեղափոխվում ենք մեզ սպասող  Ուազ ավտոմեքենան և սկսում ենք ուղևորությունը արգելոցի տարածքով:  

Յոգայի դասը կանցկացնենք բացատում՝ մինչև քայլարշավը: 

Յոգան մտքի, մարմնի և հույզերի  ներդաշնակեցմանը նպաստող գիտություն է, ճնշող մտքերից ազատվելու գերազանց միջոց: Կրթելով մարմինն ու հոգին՝ այն նպաստում է խորը ինքնաճանաչմանը: Նպաստելով ընդհանուր առողջացմանը, մարմնի ճկունության ձեռքբերմանը, քաշի նվազմանը, հոդերի շարժունակության վերականգնմանը, ճիշտ շնչառության ձևավորմանը՝ յոգան բնության գրկում  մի առանձնահատուկ փորձ է: Այն պարգևում է ձեզ  անկրկնելի  պահեր: Եկեք, որ համոզվեք ինքներդ:

Յոգայից հետո կշարունակենք ճանապարհը դեպի ջրվեժներ: Պրոֆեսիոնալ ուղեկցորդի օգնությամբ դժվարությունները հաղթահարելուց հետո լեռնային արահետներով հասնում ենք ժայռերում թաքնված հեքիաթային Վահագնի ջրվեժը:

            Այնուհետև ուղղվում ենք դեպի Աստղիկի ջրվեժը:  Վահագնի և Աստղիկի ջրվեժները միմյանց հետ դիցաբանորեն կապված են. հեթանոսական պանթեոնում Աստղիկը գեղեցկության ու պտղաբերության աստվածուհին էր՝ կրակի և պատերազմի աստված Վիշապաքաղ Վահագնի կինը:

Քայլարշավի ընդհանուր երկարությունը մոտ  6 կմ է։ Քայլարշավը միջին բարդության է, դրա համար անհրաժեշտ են չսահող սպորտային կոշիկներ, հարմարավետ հագուստ, ցանկալի է ունենալ արևապաշտպան միջոցներ (ակնոց, գլխարկ, քսուք) և մեկ օրվա  հաշվարկով սնունդ ու ջուր: Մեր կողմից տրամադրվում է թեյ, սուրճ և քաղցրավենիք:

Քայլարշավից հետո Ուազ ավտոմեքենայով կուղևորվենք դեպի Աղջոց վանք համաիրը: Ըստ ավանդության` այն հիմնադրել է Գրիգոր Լուսավորիչը IV դ. սկզբին` որպես կուսանաց վանք:  Վանքը տարբերվում է իր բարձրարժեք ու գեղեցիկ քանդակներով: Ներկայիս վանքը կառուցվել է XIII դ.: Եղել է կրոնական և մշակութային կենտրոն: Պարսպապատերով շրջապատված վանական համալիրը բաղկացած է գլխավոր` Ս. Ստեփանոս եկեղեցուց, գավթից, Ս. Պողոս-Պետրոս եկեղեցուց, բնակելի և տնտեսական շինություններից: 

Հաջորդ կանգառը Բայբուրդի կամ Գեղմահովիտի եկեղեցին է: Խոսրովի արգելոցում պահպանվել են վաղ միջնադարյան Բայբուրդ բնակատեղիի հետքերը: Գյուղատեղիի կենտրոնական մասում պահպանվել է սրբատաշ, գորշ բազալտով կառուցված, V դ. միանավ բազիլիկ եկեղեցին, որի պայտաձև ավագ խորանը դուրս է եկեղեցու ուղղանկյուն ծավալից: Ուշագրավ են կիսավեր եկեղեցու քանդակազարդ խոյակները և որմնակամարը: Հարավային կողմից կից է գավիթը, որն այժմ ավերակ է: Ըստ եկեղեցու շարվածքում պահպանված արձանագրության՝ գյուղատեղին գոյատևել է մինչև XVII դ. և հայաթափվել 1604 թ.՝ պարսից Շահ Աբաս Առաջինի իրականացրած բռնագաղթի ժամանակ:

Մեկնում՝ 09:00

Վերադարձ՝ 19:30

Մեկնելու վայր՝ Հակոբ Հակոբյան 1/ Մերգելյան ինստիտուտի հարևանությամբ