Ուշիի Սուրբ Սարգիս վանք, Սաղմոսավանք, Եղիպատրուշ

Ծրագիր՝

• Ուշիի Սուրբ Սարգիս վանական համալիր
• Ուշիի մատուռ
• Սաղմոսավանք
• Եղիպատրուշի Սուրբ Աստվածածին եկեղեցի 
• Ճոպանուղի, դահուկներ, սնոուբորդ

Տուրի առաջին կետը Ուշիի Սուրբ Սարգիս վանական համալիրն է, որը գտնվում է Ուշի գյուղից 1 կմ հյուսիս-արևմուտք` բլրի հարավային ստորոտին, որտեղ մինչ օրս պահպանվել են Ք.ա. 2-1 հազ. ամրոց-բնակատեղիի կառույցների մնացորդները: Համաձայն հիշատակությունների, պեղումներից հայտնաբերված արձանագրությունների և վիմագրությունների` հուշարձանն թվագրվում է V-XVII դարերով: Հուշարձան-համալիրն իր մեջ ընդգրկում է Ս. Սարգիս եկեղեցին, որը կառուցվել է V դարում, իսկ գլխավոր կաթողիկե եկեղեցին՝ XIII-XIV դարերում: Վանական համալիրին մաս էին կազմում նաև գավիթը, զանգակատունը, հյուրատունը, տնտեսական ու բնակելի օժանդակ շինությունները:

1827 թ. կործանարար երկրաշարժից հետո հուշարձան-համալիրը մատնվեց անուշադրության և տարիների ընթացքում այն ծածկվեց մի քանի մետր հաստությամբ հողաշերտով: Միայն 1999-2001 թթ. իրականացված պեղումների շնորհիվ հնարավոր եղավ վանական համալիրը ազատել այդ հողաշերտից, և 2004 թ. վերականգվեց V դարի Ս. Սարգիս եկեղեցին:

Այնուհետև կուղղվենք դեպի Սաղմոսավանք: Հայկական այս առաքելական վանական համալիրը  գտնվում է Սաղմոսավան գյուղում, Քասախ գետի ձախ, բարձրադիր գեղատեսիլ հատվածում։ Կառուցվել է 13-րդ դարում Այրարատյան կողմնակալության կողմնակալ Վաչե Ա Վաչուտյանի և իր իշխանական ընտանիքի կողմից։ Սաղմոսավանք բառը առաջացել է սաղմոն բառից:  Սաղմոսը հոգևոր երգն է։ Աշխարհում միակ վանքն է, որ այստեղ հնչած սաղմոսների անունով Սաղմոսավանք է կոչվել։ Եվ իսկապես, վանական այս համալիրը հրաշալի ակուստիկա ունի: Վանքից դեպի կիրճ գեղեցիկ տեսարան է բացվում:  

Տուրի վերջին կանգառը Եղիպատրուշ գյուղն է, որտեղ կայցելենք Եղիպատրուշի Սուրբ Աստվածածին եկեղեցին (X-XIII դարեր), իսկ դահուկասպորտի և սնոուբորդի սիրահարները կարող են դահուկներ և սնոուբորդ վարել: Այստեղ մեզ է սպասում նաև նորաբաց նստատեղային գերժամանակակից ճոպանուղին` ընդհանուր 5000 մ երկարությամբ սահուղիներով: 

Մեկնում՝ 09:00
Վերադարձ՝ մոտ 20:00
Մեկնելու վայր՝  Հակոբ Հակոբյան 1/ Մերգելյան ինստիտուտի հարևանությամբ