Աշտարակի եկեղեցիներ, Աղձքի Արշակունիների դամբարան, Բյուրականի Սուրբ Հովհաննես եկեղեցի, Արտավազիկ եկեղեցի + զիպլայն

• Աշտարակի եկեղեցիներ
• Աղձքի Արշակունիների դամբարան
• Բյուրականի Սուրբ Հովհաննես եկեղեցի 
• Արտավազիկ  եկեղեցի (թեթև քայլարշավ)
• Զիպլայն, թենիս կամ գինու համտես/ ըստ ցանկության

Տուրի առաջին կանգառը կլինի Աշտարակ քաղաքում, որտեղ կծանոթանանք Կարմրավոր (7-րդ դ),  Ծիրանավոր (4-5-րդ դդ) և Սպիտակավոր (5-6-րդ դդ) եկեղեցիների պատմությանը:

       Հաջորդ կանգառը Աղձք գյուղում գտնվող Արշակունիների դամբարանն է:  Արշակունի թագավորների աճյունները ամփոփված են եղել Աղձքի արքայական դամբարանում, որը թվագրված է 4-րդ դարի երկրորդ կեսով։ Իսկ 5-րդ դարում դամբարանին կից կառուցվել է բազիլիկ եկեղեցի, որը վերակառուցվել է 19-րդ դարում։ Փավստոս Բուզանդի վկայությամբ՝ Պարսից Շապուհ Բ արքան, 364 թվականին գրավելով Անի-Կամախը, փորձել է այնտեղ թաղված հայ թագավորների աճյունները Պարսկաստան փոխադրել: Պարսիկների պատկերացմամբ, մասունքների հետ միասին իրենց երկիր կտեղափոխվեր նաեւ նրանց «փառքը, բախտն ու քաջությունը»։ Սակայն Վասակ Մամիկոնյանը, Այրարատ նահանգում հաղթելով պարսիկներին, խլել է հայոց արքաների աճյուններն եւ դրանք հողին հանձնել Աղձքում։

Այնուհետև կուղևորվենք դեպի Բյուրական, որտեղ կայցելենք Սուրբ Հովհաննես եկեղեցին: Այս ճարտարապետական հուշարձանը միանավ բազիլիկ տիպի եկեղեցի է: Ավանդաբար եկեղեցու կառուցումը վերագրվում է Հովհաննես  Ե․ Դրասխանակերտցի կաթողիկոսին (898-929 թթ.), սակայն կան լուրջ հիմքեր համարելու, որ եկեղեցին կառուցվել է նշված ժամանակից էապես վաղ: 

Այնուհետև ոտքով կիջնենք դեպի Արտավազիկ եկեղեցին (թեթև քայլարշավ), որը գտնվում է Բյուրականից ոչ հեռու՝ ձորում: Եկեղեցին կառուցվել է  7-րդ դարում, կարմիր և սև տուֆից, գմբեթը խաչաձև է: Առաջին անգամ եկեղեցին վերակառուցվել է 12-րդ դ., երկրորդ անգամ՝ 1959-1960 թթ.: 1840 թ․-ի  ջրհեղեղի  ավերածությունների պատճառով եկեղեցին զգալիորեն  վնասվել է: Հայկական միջնադարյան եկեղեցական ճարտարապետության մեջ  Արտավազիկի եկեղեցին  առանձնանում է իր ինքնությամբ: Պատմական աղբյուրներում այն հիշատակվում է, իսկ  եկեղեցում, ցավոք,  չեն պահպանվել վիմագիր արձանագրություններ։ Վարկածներից մեկի համաձայն՝ ի պատիվ կառուցողի անվան եկեղեցին կոչվել է Արտավազդ: Այսօր եկեղեցին գտնվում է կիսավեր վիճակում։ Ավերված է ժողովատեղին և գմբեթը:

Տուրի վերջին կանգառը Զիպվայնում է, որտեղ ցանկացողները կարող են օգտվել զիպլայնից, խաղալ թենիս, համտեսել գինի, ճաշել կամ պարզապես հանգստանալ:  

Մեկնում՝      10:00
Վերադարձ՝   19:00
Մեկնելու վայր՝ Հակոբ Հակոբյան 1/ Մերգելյան ինստիտուտի հարևանությամբ