Յոգա / Մուղնի, Ս․ Աստվածածին եկեղեցի, Թեղենյաց վանք

Ծրագիր՝

Եղվարդի Սուրբ Աստվածածին եկեղեցի

Թեղենյաց վանք, Բուժական

Յոգայի պարապմունք

Մուղնիի Ս.Գևորգ վանք

Ժամանակն է զբաղվել յոգայով՝ բնության գրկում:

Տուրի առաջին կանգառն է Եղվարդի Սուրբ Աստվածածին եկեղեցին: Այն  կառուցվել է 1301թ.-ին՝ քրիստոնեությունը Հայաստանում որպես պետական կրոն հռչակելու հազարամյակի առթիվ: Եկեղեցին կառուցվել է Ազիզբեկ Իշխանի կողմից` վերջինիս կնոջ՝ Վախախի երազի հիման վրա: Եկեղեցին կոչվում է դամբարան եկեղեցի, որովհետև այստեղ է ամփոփված է Ազիզբեկ Իշխանի որդու աճյունը:  

Եղվարդի Սուրբ Աստվածածին եկեղեցին այցելելուց հետո կշարժվենք  դեպի Թեղենյաց վանք: Այս վանական համալիրը գտնվում է Բուժական գյուղից 3 կմ հյուսիս` Թեղենիս լեռան լանջին, անտառածածկ տեղանքում: Ճանապարհն անցնելու ենք խիտ անտառի միջով՝ ամենագնացներով: Վանքը միջնադարյան հայկական ճարտարապետության խոշոր համալիրներից է: Հնավայրի հնագույն կառույցը եղել է VI-VII դարերով թվագրվող փոքր, խաչաձև Սուրբ Աստվածածին եկեղեցին, որի հիմնային մասերը հայտնաբերվել են պեղումների շնորհիվ։ Վանքի մասին առաջին հիշատակումը վերաբերում է VIII դ.: X-XIV դդ. այն եղել է մշակութային, կրթական նշանավոր կենտրոն: 1979-1989 թթ. վանքի տարածքում պեղումներ են կատարվել,  որոնց արդյունքում հայտնաբերվել է Կաթողիկե եկեղեցին, գրատունը, գավիթ-մատենադարանը, փոքր եկեղեցին: Հուշարձանախմբից ոչ հեռու պահպանվել է միջնադարյան գերեզմանատունը: Վանքից մոտ 20 մ հեռավորության վրա կարող եք տեսնել հողածածկ մատուռներ և կացարանների փլատակներ:

Ծրագրի  հաջորդ կետը յոգայի պարապմունքն է, որը կանցկացնի արհեստավարժ մասնագետը:   Յոգան մտքի, մարմնի և հույզերի  ներդաշնակեցմանը նպաստող գիտություն է, ճնշող մտքերից ազատվելու գերազանց միջոց: Կրթելով մարմինն ու հոգին՝ այն նպաստում է խորը ինքնաճանաչմանը: Նպաստելով ընդհանուր առողջացմանը, մարմնի ճկունության ձեռքբերմանը, քաշի նվազմանը, հոդերի շարժունակության վերականգնմանը, ճիշտ շնչառության ձևավորմանը՝ յոգան բնության գրկում  մի առանձնահատուկ փորձ է: Այն կպարգևի ձեզ  անկրկնելի  պահեր: Եկեք, որ համոզվեք ինքներդ:

Օրվա վերջին կանգառը կլինի Մուղնիում: Ըստ XVII դարի պատմագիր Զաքարիա Սարկավագի՝ Մուղնիի Ս.Գևորգ վանքը հիմնադրել է Հովհաննավանքի միաբանությունը: Հավանաբար դա տեղի է ունեցել XIII դ.:

Մեկնում՝ 10:00
Վերադարձ՝ 19:00
Մեկնելու վայր՝ Հակոբ Հակոբյան 1/ Մերգելյան ինստիտուտի հարևանությամբ