Վիշապալիճ, Գեղարդավանք, Չարենցի կամար

• Չարենցի կամար

• Գեղարդավանք

• Վիշապալիճ

Տուրը սկսում ենք Չարենցի կամարից, որտեղ մի պահ կանգ կառնենք, որ տեսնենք Արարատ լեռան գեղեցիկ տեսարանը: Կամարը նվիրված է հանճարեղ հայ բանաստեղծ Եղիշե Չարենցին, ով սիրում էր զբոսնել այս վայրում, հիանալ Արարատ լեռան գեղեցկությամբ և աշխատել: Կամարը կառուցվել է 1957 թ-ին, հեղինակը հայտնի ճարտարապետ Րաֆայել Իսրաելյանն է: Կամարի վրա փորագրված են Եղիշե Չարենցի հետևյալ խոսքերը «Ես իմ անուշ Հայաստանի» բանաստեղծությունիցհետևյալ տողերը`

 Աշխարհ անցի՛ր, Արարատի նման ճերմակ գագաթ չկա,

Որպես անհաս փառքի ճամփա, ես իմ Մասիս սարն եմ սիրում:

Կամարը գրեթե բոլոր զբոսաշրջիկների սիրված կանգառներից մեկն է։

Ճանապարհը շարունակում ենք դեպի բոլորիս հայտնի Գեղարդի վանքը, այն հանդիսանում է միջնադարյան վանական համալիր Հայաստանում։ Այստեղ է պահվել հայտնի գեղարդը, որով հռոմեացի զինվորը ծակել է Քրիստոսի կողը։ Այն Հայաստան էր բերել քրիստոնեության առաջին քարոզիչներից Թադեոս առաքյալը։ Այժմ այն գտնվում է Վաղարշապատում՝ պատմության թանգարանում։ Հիմնական հուշարձանախմբում են գլխավոր Կաթողիկե եկեղեցին, գավիթը, ժայռափոր 2 եկեղեցին, ժամատուն-դամբարանը։

Տուրի վերջին կանգառն է Վիշապալիճը կամ Վանքի լիճը:  Գեղամա լեռներում թաքնված 2600 մետր բարձրության վրա գտնվող Վիշապալիճը շրջապատված է Վիշապասար և Աժդահակ բարձր լեռներով: Լճից ոչ հեռու կանգնեցված է երկու վիշապաքար, որոնք ունեն 2-3 հազարամյա պատմություն: Նրանցից մեկի բարձրությունը հասնում է 3,5 մետրի, մյուսը ավելի փոքր է: Վիշապաքարերի վրա արագիլ է պատկերված:

Լիճը գտնվում է Գեղարդ գյուղից մոտ 12 կմ հեռավորության վրա (մոտ 15 կմ անցնելու ենք դժվարանցանելի և քարքարոտ ճանապարհով):  Լիճ տանող ճանապարն անցնում է Գեղարդի կիրճով, որտեղից կախարդական տեսարան է բացվում և երևում  է Գեղարդի վանքը:

Մեկնում՝ 10:00

Վերադարձ՝  20:00

Մեկնելու վայր՝ Հակոբ Հակոբյան 1/ Մերգելյան ինստիտուտի հարևանությամբ